Serie finale e play-offit në elitën e basketbollit kosovar po shkon drejt fundit. Nesër do të luhet ndeshja e gjashtë mes Trepçës dhe Bashkimit.

Në palestrën “Minatori” me fillim nga ora 19:00, luhet beteja e radhës ku mund të jetë përckatuese për titullin kampion, shkruan Arbresh.info.

Aktualisht, mitrovicasit po triumfojnë 3-2 me seri dhe iu duhet vetëm edhe një fitore për t’u shpallur kampion.

Kampion shpallet skuadra që arrin katër fitore e para. Bashkimi udhëton nesër në Mitrovicë, për ta barazuar serinë dhe për ta bërë edhe më dramatike, duke e çuar në ndeshjen e shtatë.

Kurse për “xehetarët” është mundësia që të shpallen kampion para publikut të tyre.

Deri më tani këtë sezon në play-off, Trepca ka luajtur pesë ndeshje si vendas dhe i ka fituar të gjitha. Ndërsa Bashkimi ka luajtur gjithsej katër herë në “Minatori” dhe nuk ka fituar asnjë ndeshje./Arbresh.info